Akibat Judi

= AKIBAT JUDI =

Watee ta jak-jak meu teumee situek
Watee ta duek-duek peugot keu tima
Uroe malam laloe ngon fesbuk
Hantom ta peuduek status yang meuguna

Rugoe mata ngon rugoe watee
Ibadah teuntee kureung ta kerja
Ladoem ka tuha kana meu lintee
Bacut tan malee Ibadat hana

Ladoem di ureung laloe ngon judi
Bak meja kupi teungoh wet sila
Bacut lon peugah keu ayah-ummi
Beu hati-hati aneuk neu jaga

Kadang di peugeut meuheut meu judi
Peugah bak ABI tugas sikula
Meunan jie buka bak poker judi
Rugoe that ABI habeh beulanja

Yang leupah sayang Agam ka banggi
Duek meu'en judi bah malam jula
Rugoe beulanja geu bloe CHIP judi
Ban taloe judi ka jeut ke dawa

Meu tan beulanja geu joek bak istri
Na ngon bloe campli ka hana sira
Adak na eungkot meuneng bubasi
Breuh Raskin jibie le program desa

Nyan ban dum tingkah sidroe suami
Dua ngon istri sabe jeut dawa
Watee brat karu tren jaroe gaki
Ji keun keu istri pue-pue yang hawa

Ban bacut salah ka taleuk istri
Taleuk lhee (3) ji bri hana ji kira
Watee menyesal geujak bak ahli
Lakee solusi pakriban Fatwa

Watee geutanyong le para ahli
Pakon hai akhi gata mandua
Pue na masalah ta taleuk istri
Pakriban bunyi bak lafald gata

Teuma ji seuot uleh si Agam
Di uloen tuan hana sengaja
Ka silap lidah ka salah paham
Beu jeut lon tuan lon rjuk sigra

Haba lon rika kon cuman slogan
Mandum atanyan kalheuh terjadi
Haba peu ingat wareh ngon rakan
Bek roeh hai taulan nibak buet judi

Rumoeh tangga jeut berantakan
Keu masa depan hanco meu keuba
Allah meu Firman dalam Al-Qur'an
Judi hai rakan bek roeh di gata

Oh noe mumada haba ringkasan
Beu jeut keu bahan renungan gata
Kadang na salah kisah lon tuan
Ampon bak Tuhan meu'ah bak hamba

Sumber